كلمات : سراج النعيم
تجيك مراكبي وتحرما المرسي
في بحور عينيك
يا ما كم ضفه
بتحضن شراع صباحك مرفأ
سواحلك دايره بس وقفه
أمواج صبري ضاعت وين
ونسيم صبري فاح خلسه
عشانك انتي شلت جراح
والحزن فيني أصبح وامسى
وكيف بالله كيف ارتاح
يا مراكب ما تعاندي قلبا
شال افراحو جاك يرسي
في خاطر الجريح امال
وحاجات تانية مندسه
اتاري شراعك الغدار
قطع حبل الصبر سلواي
وراح كل البنيتو انا
في شاطئ المحبة رجاي
في الضفات بغني غناي
وقلبي اللسه في ذكراك
راجيك تزيلي اساي
كلمات : سراج النعيم
شيلي خوفك من قليبك
وارمي عينيك في عيوني
اصلو عينيك هي ريدي
ونظرتك تمسح شجوني
نظرة منك واحدة تكفي
عايني لي الزول البريدك
لي قليبو الفيهو اشفي
شوفي كيف كاويهو ريدك
لي سنين راجي شوفتك
لي رموشك اقيف واعاين
ابدي اتأمل عيونك
ما غرامك فيها باين
كم ألم انتابني منك
ومن فراقك يا ملاكي
نظرة من عينيك واحدة
بيها بتوقف هلاكي
كلمات : سراج النعيم
لما جيتك كنتي غايبة
رحلتي في موج القدر
خليتي بعدك خصله تايه
خصلة من باقي الشعر
راجي فرحة تطل تشوفنا
بهجة لي باقي العمر
وفرحة أطفالنا وصغارنا
بسمة لي كل البشر
ورحتي انتي بعيد عني
خليتي لي ذكرى وصور
وبقيت انا تاني راجع
تاني للمر والسهر
عشان اغيب من دنيتك
ما حالي أصبح ما بسر
حاعيش وحاتك زولا غريب
ارسم ملامحك بالشعر
كلمات : سراج النعيم
كايسين نفتش في طريقك
عايزين نفرح بي قدومك
ما أنت الفرح بيك اكتمل
وزادت النجمات بريقا
والزهر فوح شذاه
عطر قلوبنا الحزينة
مبتهجة تستبشر قدومك
واهية انساما ورحيقا
ما بنقدر نعيش بدونك
نحن بنحبك قناعة
ونحن بنريدك حقيقة
خلي بالك ابقى عارف
نحن ما بنرضي البعاد
كيف نسيب فرحتنا ترحل
ما حبك بقالنا زاد
نحن لي دربك سلكنا
وعنو ما بنعرف حياد
يا عمر واهب فرح
سيب عنادك خلي البعاد
كلمات : سراج النعيم
يا ام الهوى ولحن الجمال
يا بدر هلا واكتمل
هيبة وجلال منك الوصال
يا نغمة عانقت الشمال
فيك محاسن فطره وخيال
بذكراك غني وطرفي جال
ولقاك زارني وغيمي شال
يا دعاش نسمة خريف
يا امل راجيو لطيف
انت الكلام عندك بفيق
يوم اشوف حسنك وصيف
انا لي معاك احتمال
يا لوحة الحب والجمال
منقوشه بي أحرف دلال
انت ست الكل مثال
كلمات : سراج النعيم
الريده يا غالي
طوالي في زيادة
وحبك بقالنا قدر
خلانا في سعادة
يا روعة الإبداع
الحالي انشاده
يا فرحة الايام
يا أميرة يا غاده
اليوم بقالنا طويل
راجنو شان نرتاح
وامالنا فيك شقي
بنفتش الافراح
يا ثغر طعمو حنان
زي روعة التفاح
ملينا سفرك طال
والنور بقالنا ظلام
نتعشم الأحزان
بي فرحة الايام
لو كان عذابنا رضاك
بنضوقوا أعلى مقام
لوكان جزانا صدود
في الصمت نلقى كلام
شان انت سيد الناس
شان عشرة الايام
نستنى تاني تحن
ورضاك أغلى مرام
كلمات : سراج النعيم
حير هواك عقلي
يا كامل الاوصاف
يا لوحة من وديان
خطفت عيون الشاف
مليانة ريد وحنان
مزدانة ود وعفاف
كملت كل صفات
يا رائعة يا الطاف
في المشية تتني
تتحدى ريم غزلان
وفي البسمة يتشابه
برقا شلع عجلان
في عيونا شفت الويل
بي سهاما متنا زمان
الروعة فيك عفة
والحشمة ليك عنوان
مخلوقة من نوع خاص
ما بشبه الإنسان
يا أهلنا جنينا
تعالو شوفو الحور
بتبدل الاحزان
لي ريد وحب وسرور
في مرة لو طافت
لي جاره ما شه تزور
بتجمد الاحساس
وانكشف المستور
وتكوينا بي ناره
وتكتلنا بي ريده
.......... *تواصل شبكة (أوتار الأصيل) الإخبارية، وصحيفة العريشة الرقمية نشر الحوار الهام مع الخبير في الإقتصاد العالمي الدكتور أسامة عطا جب...
