_________
كلمات : سراج النعيم
_________
خلاص يا ناس فقدتو الخير
وفيها القسوة زدتو كتير
في ناس الجرح فيها كبير
وناس طوالي لابسه حرير
وكان فتشتو عنو
محال تلقالو تفسير
ناس مصيرهم مربوط بالقصور
وناس مفترشة الارض حصير
وناس بتلقي الفرحة ياما
بدون تعب او تفكير
وناس تشقي نهار وليل
وما بتلقي غير هما عسير
حالها محلو ثابت
محكوم بدون تغيير
الحزن انشري فيهم
زي نيلا كبير
كان الواحد اول
برضو يبقي اخير
_______
كلمات : سراج النعيم
_______
وقبال تفوت دايرك قريب
معاي تضوقو طعم الريد
ونتواصل تاني بس يا دوب
دي الفرح مالينا بالتاكيد
اتمنيت مني اصلو ما تغيب
وتكتب لي عمرا جديد
وكت قلبي في قلبك يدوب
اروي شوقي بيك شديد
بدون جراح بدون تعذيب
لكني ما لاقي منك
غايتو بس غير الصد
وكل ما افتح درب الغرام
الاقي الدروب تنسد
ونوافذي انا مشرعة جد
الا براك اخترت البعد
_______
كلمات : سراج النعيم
_______
ما ليك حق في غيابك
انا الشاريك وريدي سكونك
يا كا لي ودا مكانك
طبعي اناجيك واجي عشانك
دا كل حبي ليك
وعواطفي تهوي تحنانك
وبرضو سبحان الخلق انسانك
شجوني مدفونه في احزانك
خليني في اعماق اعماقك
يا نغم في وتري الحانك
زمني جوه في احضانك
ما تجافي مرسالي عنوانك
لو غلطت معاك سامحني
غرامي ما ببقي بدونك
يا جميل بالصبر راجيك
مشكور خدي نديانك
________
تجيك مراكبي
وتحرما المرسي
في بحور عينيك
داير ارسي
يا ما كم ضفة علي بتقسي
بتحضن شراع صباحك
مرفي
سواحلك دايره بس وقفة
امواج صبري ضاعت وين
ونسيم شوقي فاح خلسة
عشانك انتي شلت جراح
والحزن فيني اصبح وامسي
وكيف بالله كيف ارتاح
يا مراكب ما تعاندي قلباً
شال افراحو جاك يرسي
في خاطر الجريح امال
وحاجات تانية مندسة
اتاري شراعك الغدار
قطع حبل الصبر سلواي
وراح كل البنيتو انا
في شاطي المحبة رجاي
في الضفات بغني غناي
وقلبي اللسه في ذكراك
راجيك تزيلي اساي
_________
كلمات : سراج النعيم
_________
كيف هانت عليك دنياي
وقلبي المعاك في الايد
ظالمني وما عارف
وما شي هاني سعيد
يا سيد الجمال والريد
ديمه في خاطري
وقلبي يوت بوفيك
ما تبقي قاسي عنيد
ما انت اختيار قلبي
وانت طلت عيد
انت تظلم حبي
وليهو ضاعف وزيد
انا بي اذاي رضيت
ما دام رضيتو هلاكي
ذنبي كلو عليك
لكني رغم الكان
برجاك بالاشواق
مصيرو ترجع لي
اصلو الفراق حراق
وديمه البريد صادق
برجع اكيد مشتاق
__________
كلمات : سراج النعيم
___________
ليه ما علمتيني
اجي حلم في مدارك
وين وديتي اصرارك
خلاص ضاقت بي اعذارك
يا رحيق في زهرة مشتول
يا حارمني فيك بقول
الجرح فيني طول
والفراق مكتوب علي اول
وين وديتي العزيمة
يعني فكرتنا بقت قديمة
كفاية تديني الذكري الاليمة
وجاي هسع تبللي عشقي بالهزيمة
يا فرح الغناوي ما تبقي استحالة
ما في محنه في ديارك
حزنان كتير في انتظارك
شوقي بنسي انك وصاله
انتي قايله تاني برجع
ما الرجعة ذاتا ملت انتظاره
ندمان عليك لا لا
الروح راحت بالجرح محالا
_________
كلمات : سراج النعيم
_________
طليتي زي غيمة فرح
والليلة مازي كل يوم
يا شهد يا دفقة مرح
شلتيها من خاطري الهموم
يوم جيتي يا شهد العمر
البسمة زارت اي وش
سافرنا في عيونك سفر
ورشيتي فينا الفرحة رش
غنينا ليك الاغنيات
في قلوبنا اسمك اتنقش
وعزفتي في الوتر الحلم
الليهو مده ولا انهبش
الليلة مهما قلنا فيك
يا حلوة يحتار الوصف
طرزت اسمك بالرذاذ
وتوهتي في قلمي الحرف
ما عرفت اكتب فيك شنو
والفرحة دمعتا ما بتجف
يا نسمة في عز الهجير
يا محركة الزمن الوقف
.......... *تواصل شبكة (أوتار الأصيل) الإخبارية، وصحيفة العريشة الرقمية نشر الحوار الهام مع الخبير في الإقتصاد العالمي الدكتور أسامة عطا جب...
